Marahil marami sa atin ay pamilyar na sa iba’t ibang uri ng patalastas. Nariyang pagkwentuhan natin, pag-usapan, minsan pa nga’y ginagaya natin ang mga ito. Subalit sa dinami-dami man ng mga patalastas, iilan lamang ang siyang tumatatak at nananatili sa ating isipan.
Sa ating henerasyon ngayon, makikitang sikat na sikat ang patalastas ng Ako Mismo, Ako ang Simula at iba pa. Magandang patunay nito ay ang kapansin-pansin na paglaganp ng mga dog tag, stickers, posters, flyers at kung anu-ano pa, ang madalas na usapan ng mga tao ukol dito, at ang pagrami ng mga lumalahok sa mga naturang programa.
Ang mga patalastas na ito ay ilan lamang sa mga patunay na ang bawat isa sa atin ay naghahangad ng maayos, maganda at maunlad na pamumuhay at lipunan. Sa kabila ng mga nararanasan nating problema, gulo at di-pagkakaunawaan sa ating paligid at lipunan, patuloy tayong naghahangad ng kapayapaan at pagkakaisa bilang isang indibidwal o bahagi ng isang pamayanan.
Tayo, bilang isang kristiyano at bahagi ng isang simbahan ay siguradong may magagawa. Ang pinakamatibay nating sandata at makakapitan ay ang panalangin. Ito ang nagbubuklod at nag-uugnay sa ating munting pamayanan. Ikaw, ano ang dalangin mo? Sa iyong sarili? Sa iyong kapwa? Sa iyong pamayanan at bayan?
No comments:
Post a Comment